Тегишли хусусийлаштириш дастурларига мувофиқ, Давактив агентлиги “Андижон биокимё заводи” АЖ (кейинги ўринларда - Корхона) устав капиталидаги 96,0 фоиз давлат акциялар пакетини профессионал консультантни жалб этган ҳолда музокараларга оммавий равишда таклиф қилиш йўли билан ташкиллаштирилган хусусийлаштириш натижалари бўйича 101,3 млрд.сўм сотиб олиш тўловларини тўлаш шартлари билан “Jasmin Gold Group” МЧЖ (кейинги ўринларда - Харидор) савдо ғолиби деб топилганлигини маълум қилади.
Ушбу жараёнга “ABRAU CAPITAL” компанияси (кейинги ўринларда – Консультант) хусусийлаштириш бўйича консультант сифатида жалб этилган.
Аввал хабар берилганидек, рақобат муҳити таъминланган савдо жараёни натижасида, инвесторлар томонидан келиб тушган аризалар (Express of Interest) уларнинг тўловга қобилиятлилик, хусусийлаштириш жараёнида иштирок этилишини тақиқлаши мумкин бўлган маъмурий, ҳакамлик ёки бошқа суд жараёнларининг йўқлиги ҳамда Европа Иттифоқи ва АҚШнинг, шунингдек йирик халқаро молия институтларининг санкциялари рўйхатига киритилмаганлиги юзасидан ўрганилиб, мазкур шартларга мувофиқ келадиган талабгорлар хусусийлаштириш жараёнининг кейинги – Мажбуриятга эга бўлган таклифлар (BO)ни тақдим этиш босқичига ўтказилган.
Ушбу босқичда талабгорлар билан Ахборотни ошкор этмаслик тўғрисидаги битим (NDA) имзоланиб, Консультант томонидан тайёрланган Корхонанинг молиявий, солиқ, ҳуқуқий ва экологик фаолияти юзасидан комплекс таҳлил (due diligence) ҳисоботлари жойланган виртуал маълумотлар хонаси (VDR)га кириш ва Корхонанинг бошқарув органи билан учрашиш ҳамда Корхона билан танишиш имконияти яратилган.
Ўз навбатида, Консультант томонидан "Андижон биокимё заводи" АЖ устав капиталидаги давлат акция пакетларини яхлит пакет (96,0 фоиз) сифатида сотиш бўйича таклифлар қабул қилинган.
Натижада, сотиб олиш учун қўйилган талабларга тўлиқ жавоб берган, келажакда Корхона фаолиятини барқарор ривожланишини таъминлай оладиган ва ишлаб чиқариш жараёнларини тўлиқ давомийлигини шакллантиришга салоҳиятли бўлган “Jasmin Gold Group” МЧЖ энг юқори нарх таклифи билан савдо ғолиби деб топилди.
Таъкидлаш жоизки, Харидорнинг таклифи консультант томонидан ҳисобланган Корхонанинг индикатив нархлар оралиғининг юқори қисмида жойлашган ҳамда Корхонанинг баҳоланган қийматидан юқори.
Корхонани хусусийлаштириш натижалари Давлат активларини хусусийлаштириш ва хусусийлаштириш жараёнларини мувофиқлаштириш давлат комиссиясининг тегишли қарори билан маъқулланган.
Маълумот ўрнида, 2023 йилда “Андижон биокимё заводи” АЖ томонидан 1,0 млн дал спирт ишлаб чиқарилган бўлиб, соф фойдаси 10,1 млрд сўмни, соф активлари 71,5 млрд сўмни ва жами мажбуриятлари 17,3 млрд сўмни ташкил қилган.
