Ўзбекистон Республикаси Президентининг 2021 йил 11 февралдаги “Давлат активларини хусусийлаштириш жараёнларини янада жадаллаштириш тўғрисида”ги ПФ–6167-сон Фармонига мувофиқ, Ўзбекистон Республикаси Давлат активларини бошқариш агентлиги (кейинги ўринларда – Агентлик ёки Сотувчи) “Сувмаш” АЖ (кейинги ўринларда – Компания ёки Сувмаш) устав капиталидаги 47,0 фоиз акциялар пакетини музокараларга оммавий таклиф этиш орқали сотиш режасини эълон қилади (кейинги ўринларда – Битим ёки Сотув).

Deloitte халқаро компанияси ушбу Битим бўйича Агентлик маслаҳатчиси вазифасини бажаради. Агентлик томонидан берилган ваколатга асосан “UzAssets инвестиция компанияси” АЖ(кейинги ўринларда – UzAssets) сотув жараёнларини маслаҳатчи билан биргаликда ташкил этади. “Dentons” юридик фирмаси “UzAssets” активларни хусусийлаштириш бўйича фаолиятига ҳамроҳлик қилади.

Компания тўғрисида қисқача маълумот:

"Сувмаш" АЖ насос агрегатлари, тегишли ускуналар ва бутловчи қисмларни ишлаб чиқариш ва таъмирлашга ихтисослашган бўлиб, бозорда 1971 йилдан бери ўз фаолиятини кўрсатади.

Компания “Иргидромаш”, “Туямўйин” ГЭСи, Тўпаланг сув омбори, Аму-Бухоро машина канали ва бошқа йирик сув хўжалиги объектлари учун Ўзбекистон Республикаси ва қўшни давлатлар учун маҳсулот етказиб берувчи ўз сегментида тан олинган етакчи корхоналардан бири ҳисобланади. Компаниянинг Тошкент шаҳри (Ҳ.Бойқаро кўчаси, 21)да умумий майдони 12,8 гектар бўлган ишлаб чиқариш мажмуаси бўлиб, ишчилар сони 257 кишини ташкил этади.

2020 йил якуни бўйича компаниянинг даромади 45 миллиард сўмдан, соф фойдаси эса 4,3 миллиард сўмдан ошди.

Ўзбекистон Республикаси Ҳукумати томонидан қабул қилинган Гидроэнергетикани ривожлантириш дастури ва Ирригация тармоғини янада ривожлантириш стратегиясини ҳисобга олган ҳолда, янги гидроэлектр станциялар ва насос станцияларини қуриш ҳамда мавжудларини модернизация қилишни назарда тутган ҳолда компаниянинг янада ривожланиш истиқболлари мавжуд.

Битимни амалга ошириш жараёни

Сотув жараёни барча манфаатдор томонлар (кейинги ўринларда – Иштирокчилар) учун очиқ бўлган таклифларни тақдим этишнинг рақобатга асосланган жараёни сифатида ташкил этилган. Жараён манфаатдор харидорлардан таклифларни қабул қилиш ва бир ёки бир нечта манфаатдор иштирокчилар билан кейинги музокаралардан иборат бўлади.

Ҳозирда Иштирокчилар қуйидаги маълумотларни ўз ичига олган ариза хатида (кейинги ўринларда - "Мажбурий бўлмаган таклиф") ўз қизиқишларини билдиришлари тавсия этилади:

1. Давлат рўйхатидан ўтказилганлиги тўғрисидаги гувоҳноманинг нусхаси;
2. Охирги 3 йил учун аудит қилинган консолидацияланган молиявий ҳисобот;
3. Барча акциядорлар (ва уларнинг мулкий манфаатлари) ва якуний бенефициарлар тўғрисидаги маълумотлар;
4. Таклиф нархи ва Битим шартлари
5. Битимни, шунингдек Компаниянинг операцион фаолиятини ўз ва/ёки қарз маблағлари ҳисобидан молиялаштириш имконияти мавжудлигини тасдиқлаш;
6. Сохта тадбиркорлар ва банкротларнинг халқаро рўйхатларига, шунингдек, Ўзбекистон Республикасининг шу каби рўйхатларига киритилмаган бўлиши лозим.
7. “Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида”ги Ўзбекистон Республикасининг 660-ИИ-сонли Қонунига (2019 йил 15 январдаги таҳририда) риоя қилиш;

Мажбурий бўлмаган таклиф аризачининг хоҳишига кўра ўзбек, рус ёки инглиз тилларида тайёрланиши мумкин.

Аризаларни ва унга илова қилинган ҳужжатларни кўриб чиқиш натижаларига кўра, танлов натижалари ва кейинги босқичлар тўғрисида Иштирокчилар шахсан хабардор қилинади.

Мажбурий бўлмаган таклифларни кўриб чиқиш асосида энг яхши таклифларни тақдим этган Иштирокчиларга, Компания ҳақида қўшимча маълумотлар, жумладан Deloitte томонидан тайёрланган таҳлилий ҳисоботлар (due diligence), олди-сотди шартномаси лойиҳаси тақдим этилади ва улардан Мажбурий бўлган таклифларни тайёрлаш сўралади. Мажбурий таклифларни тайёрлаш муддатлари ва унинг тузилишига қўйиладиган талаблар билан танланган иштирокчилар шахсан хабардор қилинади.

Аризалар ва санаб ўтилган ҳужжатларнинг тақдим этилиши Иштирокчига Ошкор этмаслик тўғрисидаги битимни имзолаганидан сўнг, Deloitte томонидан тайёрланган маълумотларни батафсил ўрганиш имкониятини беради.

Мажбурий бўлмаган таклифлар кўринишида аризаларни топширишнинг охирги муддати 2021 йил 10 декабр Тошкент вақти билан соат 18:00гача.

Аризалар ва мажбурий таклифлар қуйидаги электрон манзилларга юборилиши керак: rmukhametshin@deloitte.uz, amaltseva@deloitte.kz, sh.oxunov@davaktiv.uz ва a.kahhorov@uz-assets.uz.

Аризалар бериш жараёни барча Иштирокчилар учун очиқ.

Қўшимча шартлар:

Агентлик сотиш жараёнининг кетма-кетлигини ўзгартириш ёки потенциал харидорга (харидорларга) сотишни ёки сабабларини тушунтирмасдан исталган вақтда улар билан музокара олиб боришни рад этиш ҳуқуқини ўзида сақлаб қолади.

Ушбу эълон ёки унинг мазмунининг бирон бир қисми мазкур эълон чоп этилишидан келиб чиқиб тахмин қилиниши мумкин бўлган Агентлик, UzAssets, Сувмаш ва Deloitteнинг Заводни сотиш билан боғлиқ бирор бир шаклдаги мажбурияти сифатида талқин қилинмаслиги керак. Агентлик UzAssets ва Deloitte ўз хоҳишига кўра ҳар қандай вақтда ва ҳар қандай ҳолатда, биргаликдаги ёки шахсий жавобгарликни ўз зиммаларига олмасдан:

(i) аризалар бериш муддатига ўзгартириш киритиш;

(ii) ҳар қандай сабабга кўра сотиш жараёнини тўхтатиш; ва/ёки

(iii) исталган вақтда ва сабабларни тушунтирмасдан Битимга тааллуқли бўлган ҳар қандай потенциал харидор (харидорлар) билан ҳар қандай муҳокама ва музокараларни тугатиш ҳуқуқларини ўзида сақлаб қолади.