Марказда навбатдаги илмий семинар ташкил этилди
Марказ томонидан 2025 йил 25 сентябрда Мулкчилик ва бозор муносабатлари ривожланишини таҳлил қилиш ва моделлаштириш илмий лабораторияси доирасида навбатдаги илмий семинар ташкил этилди. Унда катта илмий ходим Т.А.Қодиров 2025 йилнинг III чорагида амалга оширилган тадқиқот натижалари бўйича «Қишлоқ хўжалигига мўлжалланмаган ер участкаларини хусусийлаштириш ҳолатини таҳлил қилиш ва ушбу жараённи янада фаоллаштириш бўйича таклифлар» мавзусида, кичик илмий ходим Б.Ш.Усманов 2025 йилнинг III чорагида амалга оширилган тадқиқот натижалари бўйича «Муниципал мулкни бошқариш механизмини такомиллаштириш муаммолари ва уларни ҳал этиш йўллари» мавзусида маъруза қилишди (рус тилида).
Тадқиқотлар маркази томонидан халқаро симпозиум ташкил этилди
2025 йил 19 сентябрь куни Hilton Tashkent City меҳмонхонасининг анжуманлар залида «Иқтисодиёт ва бизнес бошқаруви соҳасидаги илғор тадқиқотлар» мавзусида халқаро симпозиум бўлиб ўтди. Симпозиум Ўзбекистон Республикаси Давлат активларини бошқариш агентлиги ҳузуридаги Хусусийлаштириш ва давлат активларини бошқариш муаммоларини тадқиқ этиш маркази томонидан ташкил этилди. Тадбир Жаҳон банкининг «Strategic and Institutional Modernization of the UzSAMA Research Center towards Enhancing Capabilities and Improving Performance of Research Activity (SAMARA)» лойиҳаси доирасида ўтказилди.
Симпозиумда Ўзбекистон, Германия, Россия, Қозоғистон, Қирғизистон, Туркия, Польша, Озарбайжон ва бошқа мамлакатлардан келган 100 дан ортиқ етакчи олимлар, профессорлар ва амалий соҳа вакиллари иштирок этишди. Тадбир доирасида иқтисодий тараққиёт, барқарор ривожланиш, бизнес жараёнларини трансформациялаш, инновацион бошқарув ва инвестиция стратегиялари соҳасидаги энг сўнгги тадқиқотлар ва замонавий концепциялар кўриб чиқилди.
Замонавий иқтисодий тадқиқотларда таҳлилий воситалар ва методологияни ривожлантириш, шунингдек, фаннинг иқтисодиётни модернизация қилишдаги ролига алоҳида эътибор қаратилди. Профессор Герхарт Фельдмайер Ўзбекистоннинг тараққиётга интилаётганини таъкидлади, халқаро маслаҳатчи Вольфганг Лукас эса глобал савдо ва инвестициявий алоқаларнинг аҳамияти ҳақида сўз юритди.
Симпозиум якунида иқтисодиётни ривожлантириш ва халқаро илмий ҳамкорликни мустаҳкамлашга туртки бўладиган илмий тўплам нашр этилади. Симпозиум тажриба алмашиш, янги ғоялар яратиш ва барқарор ўсиш стратегияларини ишлаб чиқиш учун муҳим майдонга айланди.
Тадқиқотлар маркази республика илмий-тадқиқот институтлари ичида кучли 10 таликдан жой олди
Хусусийлаштириш ва давлат активларини бошқариш муаммоларини тадқиқ этиш Маркази “Science and Innovation” халқаро илмий журнали ва “UzReportTV” ахборот агентлиги томонидан ҳар йили ўтказиладиган “Science and Innovation Awards” танловининг “Йилнинг энг яхши илмий тадқиқот институти” номинациясига номзод сифатида иштирок этиб, танловнинг барча босқичларидан муваффақиятли ўтиб, ариза топширган республикадаги 80 та илмий-тадқиқот институтлари ичида кучли 10 таликдан жой олди.
2024 йил 21 декабрда Туркистон санъат саройида бўлиб ўтган “Олимлар байрами”да “Science and Innovation Awards-2024” тақдирлаш маросимида Марказ “Йилнинг энг яхши илмий-тадқиқот институти” танловининг финалисти сифатида республиканинг энг кучли 10 та илмий-тадқиқот институтлари қаторида жой олганлиги учун диплом билан тақдирланди.
