Тегишли хусусийлаштириш дастурларига мувофиқ, Давактив агентлиги “Ўзбекистон шампани” АЖ (кейинги ўринларда - Корхона) устав капиталидаги 51,48 фоиз давлат акциялар пакетини сотиш бўйича профессионал консультантни жалб этган ҳолда ташкиллаштирилган савдо натижалари бўйича қуйидагиларни маълум қилади.
Бунда, Давактив агентлиги томонидан энг мақбул таклифларни танлаб олиш асосида KPMG халқаро компанияси (кейинги ўринларда – Консультант) хусусийлаштириш бўйича консультант сифатида жалб этилган.
Консультант томонидан хусусийлаштириш жараёни доирасида ҳам маҳаллий, ҳам халқаро даражада кенг кўламли маркетинг ишлари амалга оширилди, жумладан инвестиция тизерлари консультантнинг инвесторлар тармоғи орқали турли салоҳиятли инвесторларга (investor sounding) юборилди.
Натижада инвесторлардан сотиб олиш бўйича қизиқиш тўғрисидаги 5 та аризалар (Express of Interest) келиб тушди.
Талабгорлар хусусийлаштириш жараёнида иштирок этилишини тақиқлаши мумкин бўлган маъмурий, ҳакамлик ёки бошқа суд жараёнларининг йўқлиги ҳамда Европа Иттифоқи ва АҚШнинг, шунингдек йирик халқаро молия институтларининг санкциялари рўйхатига киритилмаганлиги юзасидан ўрганилган.
Талабгорларнинг 4 таси хусусийлаштириш жараёнининг кейинги босқичи – Мажбуриятга эга бўлган таклифлар (BO)ни тақдим этиш босқичига таклиф этилди. Ушбу босқичда талабгорлар билан Ахборотни ошкор этмаслик тўғрисидаги битим (NDA) имзоланиб, Консультант томонидан тайёрланган Корхонанинг молиявий, солиқ, ҳуқуқий ва экологик фаолияти юзасидан комплекс таҳлил (due diligence) ҳисоботлари жойланган виртуал маълумотлар хонаси (VDR)га кириш имконияти яратилди. Шу билан бирга, барча талабгорларга Корхонанинг бошқарув органи билан учрашувлар ташкил этиш ҳамда Корхона билан танишиш имконияти яратилди.
Қайд этиш жоизки, келиб тушган таклифлар орасида энг юқори нарх таклифи билдирган, келажакда жамият фаолиятини барқарор ривожланишини таъминлай оладиган ва ишлаб чиқариш жараёнларини тўлиқ давомийлигини шакллантиришга салоҳиятли бўлган “Euro Pack” МЧЖ (кейинги ўринларда – Харидор), “Ўзбекистон шампани” АЖ устав капиталидаги 51,48 фоиз давлат акциялар пакетини сотиб олиш учун қўйилган талабларга тўлиқ жавоб берган ва 72,0 млрд.сўм сотиб олиш тўлови билан ғолиб деб топилган.
Шу билан бирга, Харидорнинг таклифи халқаро консультант томонидан ҳисобланган Корхонанинг индикатив нархлар оралиғининг юқори қисмида жойлашган ҳамда Корхонанинг баҳоланган қийматидан юқори.
Корхонани хусусийлаштириш натижалари Давлат активларини хусусийлаштириш ва хусусийлаштириш жараёнларини мувофиқлаштириш давлат комиссиясининг тегишли қарори билан маъқулланган.
Шунингдек, Харидор сотиб олиш тўловига қўшимча равишда 2024-2025 йилларда Корхонани ривожлантириш учун 18,5 млн. АҚШ доллари миқдорида инвестиция киритиш, бунда ишлаб чиқариш қувватларини реконструкция ва модернизация қилиш, коньяк спиртини ишлаб чиқариш ускунасини ва сақлаш учун дуб бочкаларини ўрнатиш, шу билан бирга, гастрономик туризмни ривожлантириш ва ривожланган бу каби ишлаб чиқаришнинг самарали тажрибасидан келиб чиқиб, Корхона ҳудудида ресторан ва дегустация залини ташкил этиш, Паркент туманида узумчилик плантациясини ташкил этиш ҳамда винотуризм масканини барпо этиш каби мажбуриятларни ўз зиммасига олади.
Маълумот учун: “Euro Pack” МЧЖ – алкоголь маҳсулотлар учун керакли бўлган шиша ва пластик идишларни ишлаб чиқарувчи корхона ҳисобланади.
