Давлат активларини бошқариш агентлиги томонидан жорий йил 20 ноябрь куни чоп этилган эълонга мувофиқ, “ЎЗ ДОНГЖУ ПЭИНТ КОМПАНИ" МЧЖ ҚК (кейинги ўринларда - "Компания" ёки "Актив") устав капиталидаги 50,0 фоиз давлат улушини (кейинги ўринларда – "Битим") хусусийлаштириш жараёни юзасидан қуйидагилар маълум қилинади.

Аввал маълум қилганимиздек, "Rezolut" консалтинг компанияси ва "Dentons Tashkent" адвокатлик фирмаси консорциуми (кейинги ўринларда – "Маслаҳатчи") ушбу Битим юзасидан Агентликнинг маслаҳатчиси сифатида жалб қилинган.

Компаниянинг хусусийлаштириш жараёнлари доирасида Маслаҳатчи томонидан кенг қамровли маркетинг ишлари амалга оширилди, жумладан салоҳиятли инвесторларга инвестиция тизерлари юборилди. Натижада, 2022 йил 27 ноябрга қадар 8 нафар халқаро ва маҳаллий инвесторлар томонидан сотиб олиш бўйича қизиқиш билдириш (Express of Interest) тўғрисидаги аризалар келиб тушди.

Давактив агентлиги ҳамда хусусийлаштириш бўйича Маслаҳатчи томонидан келиб тушган барча аризалар қуйидаги мезонлар бўйича сараланади:

• хусусийлаштириш жараёнида иштирок этилишини тақиқлаши мумкин бўлган маъмурий, ҳакамлик ёки бошқа суд жараёнларининг йўқлиги;
• Ўзбекистон Республикасининг 660-II-сонли “Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида”ги Қонунига риоя этилиши;
• Талабгор (консорциум ҳолатида, консорциум аъзоларидан ҳеч бири) ва унинг тегишли шахсларидан ҳеч бири Европа Иттифоқи ва АҚШнинг, шунингдек йирик халқаро молия институтларининг (Жаҳон банки, Европа тикланиш ва тараққиёт банки, Осиё тараққиёт банки) санкциялари рўйхатига киритилмаганлиги.

Маслаҳатчи томонидан келиб тушган аризалар юқоридаги мезон талаблари асосида чуқур ўрганилди ва барча талабгорларнинг юқоридаги талабларга мувофиқлиги аниқланди.

Шунга кўра, Активни сотиб олиш бўйича қизиқиш билдириш (Express of interest) босқичидан мувофаққиятли ўтган 4 нафар талабгорлар хусусийлаштириш жараёнларининг келгуси Мажбуриятга эга бўлмаган таклиф (NBO) қабул қилиш босқичида иштирок этиш учун таклиф қилинди ҳамда уларга ушбу босқич жараёнлари тўғрисидаги хат (Process Letter 1) юборилди.

Хусусийлаштириш жараёниниг мажбуриятга эга бўлмаган таклифларни қабул қилиш босқичида ўз иштирокини тасдиқлаган талабгорлар билан Ахборотларни ошкор этмаслик тўғрисидаги битим (NDA) имзоланиб, уларга маслаҳатчи томонидан тайёрланган Активни сотиб олиш нархи бўйича индикатив мажбуриятга эга бўлмаган таклифларни тайёрлаш учун зарур бўлган ахборотни ўз ичига олган дастлабки маълумотлар тўплами (Information Memorandum) билан танишиш имконияти берадиган виртуал маълумотлар хонаси (VDR)га кириш имконияти берилди.

Жорий йилнинг 14 декабрга қадар, Маслаҳатчига Компания устав капиталидаги давлат улушини сотиб олиш нархи бўйича 4 нафар талабгорларнинг мажбуриятга эга бўлмаган таклифлари (NBO) келиб тушган. Маслаҳатчи томонидан талабгорлар таклифлари савдо жараёнининг ушбу босқичида белгиланган талабларга, шу жумладан, уларнинг молиявий кўрсаткичлари, тўловга қобилиятлилик даражаси ўрганилди ва унинг тавсиясига асосан барча 4 нафар талабгорлар савдо жараёнларининг навбатдаги мажбуриятга эга бўлган (BO) таклифларни қабул қилиш босқичига ўтказилди.

Келгусида, мазкур талабгорлар хусусийлаштириш жараёнларининг кейинги босқичларида иштирок этиш учун таклиф қилинади ҳамда уларга кейинги босқич жараёнлари тўғрисида Маслаҳатчи томонидан жараён хати (Process Letter 2) юборилади. Хусусийлаштириш жараёнларида келгусидаги ўз иштирокини тасдиқлаган талабгорларга маслаҳатчи томонидан тайёрланган Компаниянинг молиявий, солиқ, ҳуқуқий ва экологик фаолияти бўйича мустақил таҳлилий ҳисоботларини (VDD) ўз ичига олган виртуал ахборот хонасига (VDR) кириш имконияти ҳамда Компанияга ташриф буюрган ҳолда унинг бошқарув органи билан учрашиш имконияти яратилади.

Шунингдек, Маслаҳатчи томонидан Активни сотиб олиш нархи бўйича мажбуриятга эга бўлган таклифлар (BO) 2023 йилнинг 14 январь куни соат 18:00 га (Тошкент вақти билан) қадар қабул қилинади.

Давактив агентлиги ҳамда "Rezolut" консалтинг компанияси ва "Dentons Tashkent" адвокатлик фирмаси консорциуми хусусийлаштириш жараёнига қизиқиш билдирган ва аризалар топширган барча иштирокчиларга миннатдорчилик билдиради ҳамда хусусийлаштириш жараёнларининг Мажбуриятга эга бўлмаган таклиф (NBO) қабул қилиш босқичидан муваффаққиятли ўтган талабгорлар билан келгусидаги конструктив ҳамкорликни шаффоф муҳитда давом эттиради.