Ўзбекистон Республикаси Президентининг 2021-йил 11-февралдаги “Давлат активларини хусусийлаштириш жараёнларини янада жадаллаштириш тўғрисида”ги ПФ–6167-сон Фармонига мувофиқ, Ўзбекистон Республикаси Давлат активларини бошқариш агентлиги ҳузуридаги “UzAssets инвестиция компанияси” АЖ (кейинги ўринларда – UzAssets ёки Сотувчи) “Ўзбеккимёмаш заводи” АЖ (кейинги ўринларда – Компания ёки Завод) устав капиталидаги 44,71 фоиз акциялар пакетини рақобатга асосланган сотув жараёни орқали сотиш режасини эълон қилади (кейинги ўринларда – Битим ёки Сотув). Deloitte халқаро компанияси ушбу битим бўйича UzAssets маслаҳатчиси вазифасини бажаради.

Компания тўғрисида қисқача маълумот:

Компания Ўзбекистонда кимё ва нефт-газ ускуналарини ишлаб чиқариш бўйича илк корхоналардан бўлиб, 1941 йилдан буён ишлаб келмоқда. Завод иссиқлик алмашинуви ускуналари, насослар, турбокомпрессорлар, колон ва сиғимли қурилмалари, шунингдек мураккаб металлни лойиҳалаш, ишлаб чиқариш ва техник хизмат кўрсатишга ихтисослашган.

Ўзининг қуйиш ва чилангарлик цехларининг мавжудлиги, муҳандислик хизматлари ва аккредитацияланган лаборатория ишлаб чиқаришнинг тўлиқ циклини таъминлашга имкон беради. Завод ходимларининг сони 1000 кишидан ошади. Компаниянинг мижозлари ва ҳамкорлари "УзТрансГаз", "УзАавто", "Лукойл", "Газпромнефт", "Шўртан" газ-кимё мажмуаси ва шу каби йирик корхоналардан таркиб топган.

Ишлаб чиқариш ҳудуди Тошкент вилояти, Чирчиқ шаҳрида, 20,7 гектар ер участкасида жойлашган. Компания электр энергияси, табиий газ, карбонат ангидрид, кислород бўйича улкан таъминот қувватига, шунингдек темир йўл линияларининг тайёр йўлакларига эга (Чирчиқ станциясидан 5,9 км узоқликда, юк кўтариш қуввати - 250 вагон / ойига 10 000 тонна).

Битимни амалга ошириш жараёни

Сотув жараёни барча манфаатдор томонлар (кейинги ўринларда – Иштирокчилар) учун очиқ бўлган таклифларни тақдим этишнинг рақобатга асосланган жараёни сифатида ташкил этилган. Жараён манфаатдор харидорлардан таклифларни қабул қилиш ва бир ёки бир нечта манфаатдор иштирокчилар билан кейинги музокаралардан иборат бўлади.

Иштирокчиларга ўзбек, рус ёки инглиз тилларидаги хат шаклида ўз қизиқишини билдириши (аризачининг ихтиёрига кўра, аммо рус ёки ўзбек тилларида тайёрланган хат инглиз тилидаги хат билан юборилиши лозим) ва қуйидагиларни тасдиқловчи ҳужжатлар илова қилинган ҳолда юбориш сўралади:

• битимни, шунингдек операцион фаолиятни ўз ва/ёки қарз маблағлари ҳисобидан молиялаштириш имкониятга эгалиги тўғрисида;
• муассислар ва бенефициарларга нисбатан жиноий иш қўзғатилмаганлиги ва терговларнинг мавжуд эмаслиги, Харидорнинг мансабдор шахсларининг исмлари сохта тадбиркорлар ва банкротларнинг халқаро рўйхатларига, шунингдек, Ўзбекистон Республикасининг шу каби рўйхатларига киритилмаганлиги тўғрисида;
• “Жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш тўғрисида”ги Ўзбекистон Республикасининг Қонунига риоя қилиниши тўғрисида.

Аризалар ва санаб ўтилган ҳужжатларнинг тақдим этилиши Иштирокчига Ошкор этмаслик тўғрисидаги битимни имзолаганидан сўнг, виртуал маълумотлар хонасига кириш ҳамда Deloitte томонидан тайёрланган маълумотларни батафсил ўрганиш имкониятини беради. Ушбу босқичда иштирокчиларга Мажбурий таклифга қўйиладиган асосий талабларни ўз ичига олган жараён хати ва акцияларни сотиб олиш бўйича олди-сотди шартномаси лойиҳаси ("Шартнома") тақдим этилади. Мажбурий бўлмаган таклифлар кўринишида аризаларни топширишнинг охирги муддати 2021 йил 27 сентябр Тошкент вақти билан соат 18:00гача, мажбурий таклифлар эса икки ҳафталик муддат этиб белгиланади.

Аризалар ва мажбурий таклифлар қуйидаги электрон манзилларга юборилиши керак:  rmukhametshin@deloitte.uz, yvazhov@deloitte.ru va a.kahhorov@uz-assets.uz. Аризалар бериш жараёни барча Иштирокчилар учун очиқ.

Қабул қилинган Мажбурий таклифлар асосида UzAssets икки ҳафта ичида музокараларга қабул қилинган инвесторлар рўйхатини аниқлайди, улар танлов натижалари тўғрисида шахсан хабардор қилинади. Ушбу босқичда Сотувчи ва Иштирокчилар Битимни амалга ошириш шартлари муҳокама қилинади.

Музокаралар давомида нарх таклифи ва Шартнома бандлари бўйича келишилган шартларининг энг яхши комбинациясини таклиф қилган иштирокчи ғолиб деб эълон қилинади. Сотувчи ғолибни "Тошкент" Республика фонд биржаси қоидаларига ва Ўзбекистон Республикаси қонунчилигига биноан Битим тузишга таклиф қилади.

Қўшимча шартлар

UzAssets сотиш жараёнининг кетма-кетлигини ўзгартириш ёки потенциал харидорга (харидорларга) сотишни ёки сабабларини тушунтирмасдан исталган вақтда улар билан музокара олиб боришни рад этиш ҳуқуқини ўзида сақлаб қолади.

Ушбу эълон ёки унинг мазмунининг бирон бир қисми мазкур эълон чоп этилишидан келиб чиқиб тахмин қилиниши мумкин бўлган UzAssets, Компания ва Deloitteнинг Компанияни сотиш билан боғлиқ бирор бир шаклдаги мажбурияти сифатида талқин қилинмаслиги керак. UzAssets ва Deloitte ўз хоҳишига кўра ҳар қандай вақтда ва ҳар қандай ҳолатда, биргаликдаги ёки шахсий жавобгарликни ўз зиммаларига олмасдан:

(i) аризалар бериш муддатига ўзгартириш киритиш;
(ii) турли хил манфаатдор шахслар учун турли хил тартиб-қоидалар бўйича иш тутиш ва/ёки UzAssets, Компания ва Deloitte томонидан кўзда тутилган режа жадвал ва тартиб доирасида исталган бошқа потенциал харидорни (харидорларни) олдиндан огоҳлантирмасдан чиқариб ташлаган ҳолда бир ёки бир нечта потенциал харидорлар билан музокаралар олиб бориш;
(iii) ҳар қандай сабабга кўра сотиш жараёнини тўхтатиш; ва/ёки
(iv) исталган вақтда ва сабабларни тушунтирмасдан Битимга тааллуқли бўлган ҳар қандай потенциал харидор (харидорлар) билан ҳар қандай муҳокама ва музокараларни тугатиш ҳуқуқларини ўзида сақлаб қолади.