Вазирлар Маҳкамасининг 2020 йил 9 декабрдаги “Давлат иштирокидаги корхоналар ижро этувчи органи фаолияти самарадорлигини баҳолаш тизимини янада такомиллаштириш чора-тадбирлари тўғрисида”ги 775-сон қарорининг 4-бандига асосан давлат иштирокидаги корхоналар томонидан илғор халқаро тажриба ва стандартлар асосида корхона фаолияти давомийлигини (Business Continuity) таъминлашга қаратилган ҳужжатлар ва кўрсаткичлар ишлаб чиқилиши белгиланган.
Топшириқнинг ижросини таъминлаш мақсадида, Агентлик томонидан корхона фаолиятининг давомийлигини бошқариш (Business Continuity Management) бўйича халқаро тажриба ўрганилди ва уни тартибга солувчи халқаро норматив ҳужжатлар, шу жумладан ISO 22301:2019 стандарти асосида давлат иштирокидаги корхоналар учун корхона фаолиятининг давомийлиги режаси лойиҳаси ишлаб чиқилди.
Маълумот ўрнида, бу режа корхона томонидан олдиндан ишлаб чиқилган маълум бир ҳаракатлар режаси бўлиб, компаниянинг бизнес фаолиятига салбий таъсир қилиши мумкин бўлган эҳтимолли ҳодисаларнинг (ёнғин, зилзила, тайфун, киберҳужум ва бошқалар) олдини олиш ва улар содир бўлганда, фаолиятни тезкорлик билан тиклаш тизимини яратишни кўзда тутади. Шунинг учун, кутилмаган ҳодиса/фалокатлар содир бўлган пайтда, корхонанинг асосий бизнес фаолиятини тезлик билан тиклаш ва кутилмаган моддий зарарларни юмшатиш имконини беради.
