Ўзбекистон Республикаси Вазирлар Маҳкамасининг 2019 йил 16 сентябрдаги тегишли қарорига асосан Тошкент шаҳридаги собиқ “Чорсу” меҳмонхона мажмуасини хусусий секторга сотиш белгиланган.
Меҳмонхона мажмуаси бўйича 2020 йил 17 февралда ўтказилган “E-auksion” электрон савдо платформасидаги аукцион савдоларида Бирлашган Араб Амирликларининг “Ittihad International Investment LLC” компанияси 16,9 млрд. сўм харид тўловларини бўлиб тўлаш, икки йил муддатда 25 млн. АҚШ доллари эквивалентида инвестиция киритиш ва 150 та янги иш ўринлари яратиш ҳамда камида уч юлдузли меҳмонхона фаолиятини йўлга қўйиш шарти билан савдо ғолиби деб топилган ва олди-сотди шартномаси тузилган.
Ҳозирда инвестор томонидан харид тўловлари белгиланган график асосида амалга оширилмоқда ва муддати ўтган қарздорлик мавжуд эмас.
2020 йилда бошланган коронавирус пандемияси сабабли дунёда, шу жумладан Ўзбекистонда жорий этилган чекловлар ҳамда унинг иқтисодиётга ва инвестициялар оқимига салбий таъсири кўплаб истиқболли лойиҳаларни ишга тушириш муддатларини ортга суришга мажбур қилди.
Ҳозирги кунда инвестор томонидан профессионал лойиҳа ташкилоти жалб қилиниб, лойиҳа ҳужжатлари ишлаб чиқилмоқда, бунинг учун мустақил эксперт компанияни жалб этган ҳолда иншоотнинг техник ҳолатлари ўрганилмоқда.
