Қонун 2020 йилга мўлжалланган Давлат дастурининг 155-банди ҳамда Жаҳон банкининг “Бизнес юритиш” ҳисоботида Ўзбекистон Республикасининг ўрнини яхшилашга доир Йўл харитасига мувофиқ ишлаб чиқилган.

Қонунда қуйидаги асосий нормалар назарда тутилган:

• биринчидан – Қонуннинг номида “банкротлик” сўзи “тўловга қобилиятсизлик” сўзлари билан алмаштирилди;
• иккинчидан – соғломлаштириш таомилларини қўллашни рағбатлантириш мақсадида тўловга қобилиятсизлик жараёнида жорий солиқ тўловларини тўхтатиб туриш, тижорат банклари ва молия институтларидан кредитларни жалб этиш, қарздорлик қисман қопланганда корхона фаолиятини кредиторлар розилиги билан тиклаш;
• учинчидан – амалиётда мол-мулки етмасдан қопланмай қолган қарз маблағлари қарздор мансабдор шахслардан субсидиар тартибда ундириш тартиби белгиланмагани учун қарздорни бошқарувчи шахсларнинг ғайриқонуний ҳаракатлари оқибатида, кредиторлар талабларини тўлиқ қоплашни имконсиз қилиб қўйган шaxслар ушбу мaжбуриятлaр бўйичa суд қарорига асосан субсидиар жaвoбгaр бўлиши назарда тутилган.
• тўртинчидан – тўловга қобилиятсизлик тўғрисидаги ишнинг ўзига хос хусусиятларидан келиб чиқиб, қарздор тузган битимларни бажаришдан бош тортиш ҳамда уни ҳақиқий эмас деб топиш бўйича нормалар кенгайтирилди.
• бешинчидан – жисмоний шахснинг тўловга қобилиятсизлиги институти ва амалиёти жорий этилди. Бунда жисмоний шахснинг кредиторлик қарзини 3 йил давомида бўлиб-бўлиб тўлаш ёки унинг мулкини сотиш орқали қопланади.

Бунда,

- тўловга қобилиятсиз ҳолатига тушиб қолган жисмоний шахснинг қарзларини 3 йил муддатгача бўлиб-бўлиб тўлаш орқали тўлов муддатини кечиктириш;

- жисмоний шахснинг мол-мулкларини сотиш ҳисобига қарздорликларини қоплаш ва қопланмай қолган қарзларидан озод қилиш;

- ғайриқонуний хатти-ҳаракатлари натижасида жисмоний шахс ўзини тўловга қобилиятсизликка олиб келган ҳолатлари аниқланганда, суд бошқарувчи томонидан ҳуқуқни муҳофаза қилувчи органларга мурожаат этилади ва тўловга қобилиятсизлик тўғрисидаги иш тўхтатилади ҳамда жисмоний шахс ўз қарзларидан озод этилмайди.

• олтинчидан – улуш киритиш асосида қурилган уй-жойларни харид қилган мулкдорлар ҳуқуқлари ҳимоясини таъминлаш мақсадида бундай қурувчиларни тўловга қобилиятсиз деб топишнинг алоҳида тартиби белгиланди (улуш киритган мулкдорлар ҳуқуқлари кафолатланади).

Шунингдек, қонунга кўра, кредиторлар ҳуқуқлари кафолатларини кучайтириш, суд бошқарувчиси ҳуқуқларини кенгайтириш ва корхоналарни молиявий соғломлаштиришни рағбатлантирувчи янги тартиблар белгиланди.