Ру Ўз O'z En

Янгиликлар

18 Декабрь 2023

Ўзбекистон Республикаси Вазирлар Маҳкамасининг “Давлат мулкини ижарага бериш тартибини янада такомиллаштириш тўғрисида”ги 660-сон қарори қабул қилинди

Вазирлар Маҳкамасининг 2023 йил 14 декабрдаги “Давлат мулкини ижарага бериш тартибини янада такомиллаштириш тўғрисида”ги 660-сон қарори қабул қилинди.

Мазкур қарорга мувофиқ, давлат мулкини ижарага бериш тартиби тегишли қонунчилик ҳужжатларига мувофиқлаштирилиб, Давлат мулкини ижарага бериш тартиби тўғрисидаги низом тасдиқланган.

Шунингдек, Қарорда:

1) 2024 йил 1 мартдан давлат мулкини ижарага бериш шартномалари бўйича ижара тўловларини ундириш ва унинг тақсимотини “E-ijara” электрон дастури орқали амалга оширилиши белгиланди.

“E-ijara” электрон дастури (Солиқ қўмитаси) давлат мулкини ижарага бериш, ижара шартномаларини мониторинги ва тушумларни назорат қилиш бўйича “online-ijara.uz” ахборот тизими билан интеграция қилиш топширилган.

2) Маъмурий жавобгарлик тўғрисидаги кодексга қуйидаги ҳолларда давлат мулкини балансда сақловчилар мансабдор шахсларининг жавобгарлигини белгилаш юзасидан таклиф киритиш топширилган: 

  • самарали фойдаланилмаётган ва бўш турган давлат мулклари ҳақида маълумот тақдим этмаганлик ва яширганлик;
  • ижарага олувчига давлат мулкини топширилишини кечиктирганлик ёки ундан фойдаланишга тўсқинлик қилганлик;
  • давлат мулкини қонунчиликка зид равишда ижарага ёки текин фойдаланишга берганлик.

3) Давлат мулкини ижарага бериш тартиби тўғрисидаги низомга мувофиқ қуйидагилар белгиланмоқда:

  • давлат мулкини ижарага бериш “E-auksion” электрон савдо платформаси орқали амалга ошириш;
  • ижарага берилаётган давлат мулкининг ҳисобини юритиш “online-ijara.uz” ахборот тизими орқали амалга ошириш;
  • ижара шартномаси Давактив агентлиги ва ижарага олувчи ўртасида электрон шаклда расмийлаштириш;
  • уч ойдан ортиқ фойдаланилмасдан бўш турган давлат мулки балансда сақловчи розилигисиз ижарага бериш;
  • жисмоний шахсларнинг онлайн-буюртманомасига асосан майдони 2000 метр квадратгача бўлган давлат кўчмас мулк объектларини ижарага бериш учун тўғридан-тўғри онлайн аукцион савдоларига чиқариш;
  • ижара тўлови миқдорини ҳисоблаш формуласи аниқ белгилаш;
  • ижара тўловларини ундириш ва тақсимоти Солиқ қўмитаси томонидан “E-ijara” электрон дастури орқали амалга ошириш.

 

1340 Чоп этиш
Нажмите на кнопку ниже, чтобы прослушать текст Powered by GSpeech