Давлат активларини бошқариш агентлиги (кейинги ўринларда – Давактив агентлиги) 12 июнь 2023 йилда чоп этилган эълонга мувофиқ, “Қизилқум Фосфорит Комплекси” МЧЖ (кейинги ўринларда - "Компания" ёки "Актив") устав капиталидаги 100 фоиз давлат улушини хусусийлаштириш (кейинги ўринларда – "Битим") жараёнининг Мажбуриятга эга бўлмаган таклифлар (NBO) қабул қилиш босқичи бошланганлигини маълум қилган эди.
“Orion Capital Advisory” компанияси (кейинги ўринларда – Маслаҳатчи) ушбу Битим бўйича Давактив агентлигининг хусусийлаштириш бўйича маслаҳатчиси сифатида жалб этилган.
Ушбу босқичда талабгорларга дастлабки маълумотлар тўплами (Information Memorandum) билан танишиш имкониятини берувчи виртуал маълумотлар хонаси (VDR)га кириш имконияти яратилди ва белгиланган муддатларда Маслаҳатчига улардан Мажбуриятга эга бўлмаган таклифлар (NBO) келиб тушган.
Маслаҳатчи томонидан талабгорлар таклифлари савдо жараёнининг ушбу босқичида белгиланган талабларга мувофиқлиги, шу жумладан, уларнинг молиявий кўрсаткичлари, тўловга қобилиятлилик даражаси ўрганилди ва унинг тавсиясига асосан 2 нафар талабгорлар савдо жараёнларининг навбатдаги Мажбуриятга эга бўлган таклифларни (BO) қабул қилиш босқичига ўтказилди.
Талабгорларга Маслаҳатчи томонидан ушбу босқич жараёнлари, шу жумладан Маслаҳатчи томонидан тайёрланган молиявий, солиқ, ҳуқуқий ва экологик бўйича таҳлилий ҳисоботлардан фойдаланиш имконияти яратилганлиги, Компанияга ташриф буюриш ва Компаниянинг бошқарув органи билан учрашиш имкониятига эга эканликлари тўғрисидаги жараён хати (Process Letter) юборилади.
Маслаҳатчи томонидан Активни сотиб олиш нархи бўйича Мажбуриятга эга бўлган таклифлар (BO) 2023 йил 31 август куни соат 18:00 га (Тошкент вақти билан) қадар қабул қилинади.
Давактив агентлиги ва “Orion Capital Advisory” компанияси хусусийлаштириш жараёнига қизиқиш билдирган ва таклифлар топширган барча иштирокчиларга миннатдорчилик билдиради ҳамда Активни сотиб олиш бўйича Мажбуриятга эга бўлмаган таклифлар (NBO) босқичидан муваффаққиятли ўтган талабгорлар билан келгусидаги жараён бўйича конструктив ҳамкорликни шаффоф муҳитда давом эттиради.
