Тегишли хусусийлаштириш дастурларига асосан, Давактив агентлигининг жорий йил 4 ноябрдаги эълонига мувофиқ, “Ўзагросаноатлойиҳа” МЧЖ (кейинги ўринларда – “Актив”) устав капиталидаги 94,9% давлат улушини очиқ савдо жараёнлари бошланган.
Ўз навбатида, ушбу Активни хусусийлаштириш жараёнини илғор халқаро тажриба асосида амалга ошириш учун “Abrau Capital” (кейинги ўринларда – "Консультант") компанияси хусусийлаштириш бўйича Консультант сифатида жалб этилган.
Аввал берилган ахборотга мувофиқ, Мажбуриятга эга бўлган таклифларни (BO) қабул қилиш босқичига ўтказилган 3 нафар талабгорларнинг қатъий нарх таклифлари жорий йил 23 декабрга қадар Консультант томонидан қабул қилиниши белгиланган.
Мазкур муддат давомида Консультант томонидан барча талабгорларнинг Мажбуриятга эга бўлган таклифлари (BO) қабул қилинганлигини, лекин мазкур таклифлар Активнинг сотилиши мумкин бўлган бозор қийматдан паст бўлганлигини инобатга олиб, сотиш жараёни Активни сотиб олиш бўйича қизиқиш билдириш (EoI) босқичидан давом эттирилади.
Шунга кўра, Давактив агентлиги барча манфаатдор томонлар ва салоҳиятли инвесторларга “Ўзагросаноатлойиҳа” МЧЖ устав капиталидаги давлат улушини хусусийлаштириш жараёнининг Активни сотиб олиш бўйича қизиқиш билдириш (Expression of Interest) босқичи муддати 2025 йил 4 февраль куни соат 23:59 га (Тошкент вақти билан) қадар узайтирилганлигини маълум қилади.
Шу билан бирга, аввалги чоп этилган Активни сотиб олиш бўйича қизиқиш билдириш босқичи бошланганлиги тўғрисидаги эълоннинг қолган барча бандлари ўзгаришсиз қолмоқда.
Давактив агентлиги хусусийлаштириш жараёнларининг ҳар бир босқичи тўғрисида жамоатчиликни қўшимча тарзда хабардор қилиб борилишини таъминлайди.
Дисклеймер
Давактив агентлиги сотиш жараёнининг кетма-кетлигини ўзгартириш ёки потенциал харидорга (харидорларга) сотишни ёки сабабларини тушунтирмасдан исталган вақтда улар билан музокара олиб боришни рад этиш ҳуқуқини ўзида сақлаб қолади.
Ушбу эълон ёки унинг мазмунининг бирон-бир қисми мазкур эълон чоп этилишидан келиб чиқиб тахмин қилиниши мумкин бўлган Давактив агентлиги, “Abrau Capital” ва Компанияни сотиш билан боғлиқ бирор-бир шаклдаги мажбурияти сифатида талқин қилинмаслиги керак. Давактив агентлиги ва “Abrau Capital” ўз хоҳишига кўра ҳар қандай вақтда ва ҳар қандай ҳолатда, биргаликдаги ёки шахсий жавобгарликни ўз зиммаларига олмасдан:
(i) аризалар бериш муддатига ўзгартириш киритиш;
(ii) турли хил манфаатдор шахслар учун турли хил тартиб-қоидалар бўйича иш тутиш ва/ёки Давактив агентлиги, Компания ва “Abrau Capital” томонидан кўзда тутилган режа-жадвал ва тартиб доирасида исталган бошқа потенциал харидорни (харидорларни) олдиндан огоҳлантирмасдан чиқариб ташлаган ҳолда бир ёки бир нечта потенциал харидорлар билан музокаралар олиб бориш;
(iii) ҳар қандай сабабга кўра сотиш жараёнини тўхтатиш;
(iv) исталган вақтда ва сабабларни тушунтирмасдан Битимга тааллуқли бўлган ҳар қандай потенциал харидор (харидорлар) билан ҳар қандай муҳокама ва музокараларни тугатиш ҳуқуқларини ўзида сақлаб қолади.
