Ўзбекистон Республикаси Президентининг 2020 йил 27 октябрдаги “Давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштиришга оид чора-тадбирлар тўғрисида”ги ПФ - 6096-сон Фармони доирасида “Қизилқумцемент” АЖ устав капиталидаги 86,9 фоиз акциялар пакетини хусусийлаштиришга тайёрлаш ва инвестициявий жозибадорлигини ошириш орқали тўлиқ хусусий секторга сотиш кўзда тутилган.

Фармонга мувофиқ, корхоналарни хусусийлаштириш ва инвестициявий жозибадорлигини ошириш учун консалтинг ташкилотлари жалб қилиш кўзда тутилган.

Бугунги кунда, мамлакатимиздаги қулай инвестициявий муҳит ва аввал тасдиқланган дастурлар доирасида катта миқдордаги янги цемент ишлаб чиқариш қувватларининг ишга тушиши, шунингдек цемент бозорининг либераллашуви натижасида, 2021 йилда цемент бозорида рақобатнинг сезиларли даражада кучайиши кузатилиши мумкин.

Юқоридагиларни инобатга олиб, “Қизилқумцемент” АЖ акциялар пакетини сотишга тайёрлаш ва корхона фаолиятини трансформация қилиш масаласини ўрганиш мақсадида, Давлат активларини бошқариш агентлиги ҳузуридаги “UzAssets” инвестиция компанияси ва “Қизилқумцемент” АЖ томонидан “катта тўртлик” тоифасига кирувчи “Deloitte” халқаро консалтинг компанияси консультант сифатида жалб қилинди. “Deloitte” компанияси томонидан корхона фаолияти таҳлили (due diligence), шу жумладан ишлаб чиқариш қувватлари ҳолати ва юкланганлик даражаси, бозор ҳолати, корхонанинг ҳудуд иқтисодиёти ва ижтимоий ҳаёти учун аҳамияти таҳлили ўтказилади. Мазкур таҳлил натижасида, Корхонани сотиш жараёнида инобатга олиниши лозим бўлган мезонлар рўйхати шакллантирилади, шунингдек корхонани кейинчалик сотишга тайёрлаш бўйича чоралар кўрилади.

Бунда, кўрилаётган чораларнинг асосий мақсади - корхонанинг келгусидаги фаолиятини янада ривожлантириш ва бозордаги ўрнини мустаҳкамлаш мақсад қилинган.