28 февраль куни ижтимоий тармоқлардаги “КорпИнфо” телеграм каналида “Олмалиқ КМК” АЖ Бошқарув раиси А.Хурсанов Жамият акцияларининг катта улушига эгалик қилиши тўғрисидаги маълумот эълон қилинган.
“Олмалиқ КМК” АЖ ушбу маълумот ҳақиқатга тўғри келмаслигини расмий равишда маълум қилади.
“Акциядорлик жамиятлари ва акциядорларнинг ҳуқуқларини ҳимоя қилиш тўғрисида”ги Ўзбекистон Республикаси Қонунининг 106-моддаси ҳамда “Қимматли қоғозлар бозори тўғрисида”ги Қонунининг 44-моддасига асосан, “Олмалиқ КМК”АЖ корпоратив веб-сайтларда ҳамда корпоратив ахборот ягона порталида (open.info.uz) қонун ҳужжатларида белгиланган тартибда акциядорлар тўғрисидаги маълумотларни ўз вақтида ошкор қилиб боради.
Ҳозирги кунда “Олмалиқ” КМК АЖ устав капитали 2 407 168,30 млн. сўмни ташкил этади, шундан 98,54% - Ўзбекистон Республикаси Давлат активларини бошқариш агентлигига тегишли оддий акциялар, 1,46% эса 22 453 нафар жисмоний ва юридик шахсларга тегишли имтиёзли акциялардир.
Хурсанов Абдулла Холмурадович 2018 йил июль ойидан “Олмалиқ КМК” АЖ Бошқаруви раиси лавозимини эгаллаган. А.Хурсанов ҳеч қачон “Олмалиқ КМК” АЖ акцияларига эгалик қилмаган ва ҳозирда ҳам эгалик қилмайди.
Шу ўринда эслатиб ўтамизки, Ўзбекистон Республикасининг “Маъмурий жавобгарлик тўғрисида”ги кодексининг 40-моддаси, шунингдек, Ўзбекистон Республикаси “Жиноят кодекси”нинг 139-моддасига биноан шахсларга нисбатан қасддан ёлғон ва бошқа бир шахсни шарманда қилувчи уйдирмаларни тарқатганлик учун маъмурий ва жиноий жавобгарлик назарда тутилган.
