Жорий йил 3 июнь куни Туркия Республикаси тўқимачилик корхоналари ва инвесторларини Ўзбекистонга кенг жалб қилиш, текстиль саноатининг ҳозирги кундаги салоҳиятини оммага намойиш этиш ва савдо алоқаларини янада мустаҳкамлаш бўйича Истанбул шаҳрида “Туркия-Ўзбекистон” тўқимачилик форуми бўлиб ўтди.

Мазкур форум Туркия тўқимачилик секторининг имкониятларини чет эл томошабинларига етказиш учун мўлжалланган ноёб платформа бўлиб хизмат қилди.

Туркия Республикасининг етакчи компаниялари вакиллари, маҳаллий ҳамда хорижий инвесторлар қатнашган форумда Давактив агентлиги директорининг биринчи ўринбосари Нодирбек Хусанов ўз маърузаси билан иштирок этди.

Форум иштирокчиларига бугунги кунда хусусийлаштириш йўналишида амалга оширилган ишлар тўғрисида ахборот берилди ҳамда хусусийлаштирилиши белгиланган текстиль ва тўқимачилик маҳсулотларини ишлаб чиқаришга ихтисослашган корхоналар, шу жумладан мазкур фаолиятни жорий этиш имкони бўлган кўчмас мулк объектлари тақдимот қилинди.

Шу билан бирга, Ўзбекистонда йирик корхоналарни хусусийлаштириш жараёнларида иштирок этаётган инвесторларнинг кўлами дунёнинг турли мамлакатларидан бўлиб, уларнинг ичида шу жумладан Туркия давлатидан бўлган салохиятли инвесторлар борлиги аълохида эътироф этилди.

Бундан ташқари, бугунги кунда турк тадбиркорларининг Ўзбекистонда амалга оширилаётган хусусийлаштириш дастурларига кескин қизиқишлари ортиб, “Zelal tekstil”, “Aysel inshaat”, “Multinational mine group” ва бошқа ўнлаб турк компанияларига “E-auksion” электрон савдо платформаси орқали давлат кўчмас мулк объектлари, ер ва ер қари участкалари реализация қилинганлиги таъкидлаб ўтилди.

Шунингдек, хусусийлаштирилиши белгиланган активлар бўйича савдоларда “E-auksion” электрон савдо платформаси орқали иштирок этиш юзасидан батафсил маълумотлар ва кўрсатмалар берилди.