Вазирлар Маҳкамасининг “Давлат мулкини хусусийлаштириш ва ижарага бериш тартиби такомиллаштирилиши муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида”ги 2023 йил 10 мартдаги 100-сон қарори билан давлат активларини савдога чиқариш тартиби соддалаштирилиб, муддатлари қисқартирилди.

Хусусан, Давлат улушлари ва кўчмас мулк объектлари “E-auksion” электрон савдо платформасига чиқарилганда ёки халқаро аудит компанияси баҳолаганда баҳолаш ҳисоботини мажбурий экспертизадан ўтказиш талаби бекор қилинди.

Давлат кўчмас мулк объектларини савдога чиқариш 80 кундан 48 кунга, давлат улушлари 89 кундан 67 кунга қисқартирилди.

Олди-сотди шартномалар ва давлат ордерлари ЭРИ орқали расмийлаштирилади.

Савдоларда давлат улуши ва кўчмас мулк объектлари бўйича бир талабгор мавжуд бўлганда, у билан шартнома тузиш амалиёти бекор қилинди.

Давлат улуши (акция) бўйича харидорга тўланган қисмига мутаносиб равишда жамият бошқарувида иштирок этиш ва дивиденд олиш ҳуқуқи берилади.

Шунингдек, давлат объектларини ижарага бериш муддатлари 1 йилдан 3 йилгача, мажбурият бажарилганда эса 5 йилдан 6 йилгача узайтирилди.

Шу билан бирга, ҳоким ёрдамчиларининг онлайн-буюртманомасига асосан ҳудуди 2 000 кв.м.гача бўлган давлат кўчмас мулк объектларини сотишдан тушумлар ушбу маҳалла учун алоҳида очилган Маҳалланинг ижтимоий-иқтисодий муаммоларини ҳал этиш жамғармасига тўлиқлигича ўтказилади. Шунингдек, ҳудуди 10 000 кв.м.гача бўлган давлат кўчмас мулк объектлари сотилишидан тушумларнинг 90 фоизи маҳаллий бюджетларга (45 фоизи вилоят бюджетига, 45 фоизи объект жойлашган туман (шаҳар) бюджетига) йўналтирилади.

Бундан ташқари, Давактив агентлигининг қарорига асосан давлат кўчмас мулк объектлари билан биргаликда автотранспорт восита ва асосий воситаларини хам ўтказиш тартиби жорий этилмоқда.