Давлат активларини бошқариш агентлиги (кейинги ўринларда – Давактив агентлиги) 23 январь 2023 йилда чоп этилган эълонга мувофиқ, “Чиноз нефтни қайта ишлаш заводи” МЧЖ (кейинги ўринларда - "Компания" ёки "Актив") устав капиталидаги 100 фоиз давлат улушини хусусийлаштириш (кейинги ўринларда – "Битим") жараёнининг Активни сотиб олиш бўйича қизиқиш билдириш (Express of interest) босқичи якунланганлигини ва 7 нафар инвесторларни кейинги Мажбуриятга эга бўлмаган таклифлар (NBO) босқичга ўтганлигини маълум қилган эди.
“Mosaic Financial” компанияси (кейинги ўринларда – Маслаҳатчи) ушбу Битим бўйича Давактив агентлигининг хусусийлаштириш бўйича етакчи маслаҳатчиси сифатида жалб этилган.
Хусусийлаштириш жараёнларида келгусидаги ўз иштирокини тасдиқлаш учун, ушбу талабгорлар билан Ахборотларни ошкор этмаслик тўғрисидаги битим (NDA)ни имзолаш таклиф этилган, сўнгра уларга маслаҳатчи томонидан тайёрланган Активни сотиб олиш нархи бўйича индикатив мажбуриятга эга бўлмаган таклифларни тайёрлаш учун зарур бўлган ахборотни ўз ичига олган дастлабки маълумотлар тўплами (Information Memorandum) билан танишиш имкониятини берувчи виртуал маълумотлар хонаси (VDR)га кириш имконияти яратилган. Ушбу маълумотлар тўплами Активнинг хўжалик фаолиятини тавсифловчи ахборотларни ўз ичига олган.
Натижада, Маслаҳатчига белгиланган муддатларда 6 нафар талабгорларнинг Мажбуриятга эга бўлмаган таклифлари (NBO) келиб тушган.
Маслаҳатчи томонидан талабгорлар таклифлари савдо жараёнининг ушбу босқичида белгиланган талабларга, шу жумладан, уларнинг молиявий кўрсаткичлари, тўловга қобилиятлилик даражаси ўрганилди ва унинг тавсиясига асосан 5 нафар талабгорлар савдо жараёнларининг навбатдаги Мажбуриятга эга бўлган таклифларни (BO) қабул қилиш босқичига ўтказилди.
Мажбуриятга эга бўлган таклифлар (BO) босқичига ўтган иштирокчиларга Маслаҳатчи томонидан тайёрланган молиявий, солиқ, ҳуқуқий ва экологик бўйича таҳлилий ҳисоботлардан фойдаланиш имконияти берилади. Бундан ташқари, иштирокчилар бевосита Компанияга ташриф буюриш ва Компаниянинг бошқарув органи билан учрашиш имкониятига эга бўладилар.
Маслаҳатчи томонидан Активни сотиб олиш нархи бўйича Мажбуриятга эга бўлган таклифлар (BO) 2023 йил 18 апрель куни соат 18:00 га (Тошкент вақти билан) қадар қабул қилинади.
Давактив агентлиги ва “Mosaic Financial” компанияси хусусийлаштириш жараёнига қизиқиш билдирган ва таклифлар топширган барча иштирокчиларга миннатдорчилик билдиради ҳамда Активни сотиб олиш бўйича Мажбуриятга эга бўлмаган таклифлар босқичидан муваффаққиятли ўтган талабгорлар билан келгусидаги жараён бўйича конструктив ҳамкорликни шаффоф муҳитда давом эттиради.
