Davaktiv agentligining bir qator loyihalashtirish sohasida faoliyat koʻrsatuvchi korxonalarni (keyingi oʻrinlarda - Aktivlar) xususiylashtirish boʻyicha professional konsalting kompaniyasini (keyingi oʻrinlarda – Konsultant) jalb etish yuzasidan tanlov eʼloniga muvofiq, quyidagilar maʼlum qilinadi.

Mazkur tanlov jarayonida 7 ta mahalliy va xalqaro professional konsalting kompaniyalaridan takliflar qabul qilinib, ularning moliyaviy taklifi, sohadagi tajribasi, malakasi va belgilangan vazifalarni amalga oshirish boʻyicha yondashuvlari asosida saralandi.

Saralash natijasida, faoliyat sohasida amalga oshirgan yuqori darajadagi loyihalari, loyiha doirasida jalb qilinadigan professional jamoasining malakasi hamda eng maqbul narx taklifini bildirgan Abrau Capital kompaniyasi Aktivlarning ustav kapitalidagi davlat aksiyalar paketlari va ulushlarini xususiylashtirish boʻyicha professional konsultant sifatida tanlandi.

Konsultant quyidagi vazifalarni amalga oshiradi:

• Oʻzbekistonda va mintaqada sohani rivojlantirishdagi sharoitlarni va loyiha-qidiruv xizmati bozorini tahlil qilish;
• Aktivlarning har tomonlama (soliq, huquqiy, moliyaviy va ekologik) chuqur tahlilini oʻtkazish (due diligence);
• optimal marketing strategiyasi boʻyicha tavsiyalar, marketing materiallarini tayyorlash (tizer, info-memorandum, jarayon holati boʻyicha xat va boshqalar) va investorlar oʻrtasida axborot materiallarini tarqatish;
• Aktivlarni xususiylashtirishga qaratilgan barcha choralarni koʻrish, jumladan, virtual maʼlumotlar xonasi (VDR)ni tashkil etish,  oldi-sotdi shartnoma loyihasini (oʻzbek tiliga tarjimasi bilan, kerak boʻlsa rus va ingliz tillarida ham) tayyorlash bilan birga sotish jarayonida hamrohlik qilish.

Davaktiv agentligi Abrau capital bilan birgalikda jarayonni ochiq, shaffof va raqobat tamoyillariga asoslangan savdo mexanizmlariga muvofiq tashkil etishning barcha choralarini koʻradi hamda jarayonning har bir bosqichi toʻgʻrisida ommaga axborot berib borilishini taʼminlaydi.