Ру Ўз O'z En

Yangiliklar

30 Aprel 2023

Xalqaro moliya korporatsiyasi (IFC) “Navoiyazot” AJni xususiylashtirish jarayoniga strategik maslahatchi sifatida jalb etildi

Joriy yil 28-aprel kuni Toshkentda bo'lib o'tgan ikkinchi Toshkent xalqaro investitsiya forumi doirasida Davlat aktivlarini boshqarish agentligi va Xalqaro moliya korporatsiyasi (IFC) o‘rtasida “Navoiyazot” AJni xususiylashtirishda hukumatga ko‘maklashish to‘g‘risidagi kelishuv imzolandi.

Kelishuvga muvofiq, Xalqaro moliya korporatsiyasi (XMK) O‘zbekiston va Markaziy Osiyodagi kimyo sanoati hamda o‘g‘itlar ishlab chiqaruvchi yetakchi korxonalardan biri – “Navoiyazot” AJni xususiylashtirishdan oldingi jarayoniga strategik maslahatchi sifatida jalb etiladi.

O‘zbekiston Prezidentining 2022-yil 10-oktabrdagi qarori bilan “Navoiyazot” aksiyadorlik jamiyatini xususiylashtirishdan oldin tayyorlash zarurati belgilab qo‘yilgan. Xususiylashtirishdan oldingi tayyorgarlik hukumatga eng yirik davlat aktivlaridan birini xususiylashtirishning maqbul strategiyasini ishlab chiqishga yordam beradi. “Navoiyazot” aksiyadorlik jamiyatining keyinchalik xususiylashtirilishi O‘zbekiston kimyo sanoatiga xususiy investitsiyalarning kirib kelishi, uni modernizatsiya qilish, shuningdek, mamlakatimiz iqtisodiyotining ushbu fundamental tarmog‘i samaradorligi va raqobatbardoshligini oshirishga xizmat qiladi.

Shu bilan birga, Davaktiv agentligi rahbariyati va Xalqaro moliya korporatsiyasi (XMK)ning Yaqin Sharq, Markaziy Osiyo, Turkiya, Afgʻoniston va Pokistondagi DXSh loyihalari boʻyicha konsalting xizmatlari boshqarmasi boshligʻi Munir Feruziy oʻrtasida alohida muzokaralar oʻtkazilib, XMKning strategik maslahatchiligi bilan “Fargʻonaazot” AJ ustav kapitalidagi aksiyalar paketini xususiylashtirish boʻyicha muvaffaqiyatli kelishuvga erishilganligi taʼkidlab oʻtildi hamda “Navoiyazot”AJni xususiylashtirish strategiyasini ishlab chiqish boʻyicha kelgusida amalga oshiriladigan chora-tadbirlar va boshqa istiqbolli hamkorlik yoʻnalishlari muhokama qilindi.

“Navoiyazot” AJ haqida

“Navoiyazot” AJ mineral o‘g‘itlar, kimyoviy reagentlar va boshqa kichik hajmdagi kimyo mahsulotlari ishlab chiqarish bilan shug‘ullanuvchi O‘zbekistondagi yirik kimyo sanoati korxonalaridan biri hisoblanadi. O‘zbekiston kimyo mahsulotlarining 30 foizdan ortig‘ini ishlab chiqaradigan “Navoiyazot” aksiyadorlik jamiyati kimyo sanoatining tayanch korxonalaridan biri bo‘lib, respublika sanoati, transport, qishloq xo‘jaligi va yoqilg‘i-energetika kompleksining deyarli barcha tarmoqlarini qamrab olgan.

Xalqaro moliya korporatsiyasi (XMK) haqida

Jahon banki guruhining a'zosi bo'lgan XMK rivojlanayotgan bozorlarda xususiy sektorga yo'naltirilgan eng yirik global rivojlanish institutidir. XMK 100 dan ortiq mamlakatlarda faoliyat yuritib, rivojlanayotgan mamlakatlarda bozorlar va imkoniyatlar yaratish uchun kapital, tajriba va taʼsiridan foydalanadi. 2022-moliya yilida XMK rivojlanayotgan mamlakatlardagi xususiy kompaniyalar va moliya institutlariga rekord darajadagi 32,8 milliard dollar ajratdi, bu iqtisodiyot global, yomonlashib borayotgan inqiroz oqibatlari bilan kurashayotgan bir paytda o'ta qashshoqlikka barham berish va umumiy farovonlikni oshirish uchun xususiy sektorning kuchidan foydalangan. Qo'shimcha ma'lumot uchun www.ifc.org saytiga tashrif buyuring.

3332 Chop etish
Нажмите на кнопку ниже, чтобы прослушать текст Powered by GSpeech